Каардынацыйная Рада індывідуальных прадпрымальнікаў Рэспублікі Беларусь

ЗАЯВА

Роўна год за кратамі знаходзяцца лідэры прадпрымальніцкага руху палітвязні Мікалай Аўтуховіч і Ўладзімір Асіпенка. 8 лютага 2009 года яны і прадпрымальнік Юры Лявонаў (8 жніўня вызвалены) былі затрыманы ў Ваўкавыску ў ходзе спецаперацыі з удзелам элітнага падрадзялення міліцыі “Алмаз”.

Усім былі прад'яўлены абвінавачванні ў наўмысных падпалах і выбуху маёмасці дзяржаўных службоўцаў, якія да прадпрымальнікаў прэтэнзій не прад’явілі, бо вінаватыя ў гэтых злачынствах ужо даўно асуджаныя.

23 чэрвеня 2009 года Мікалаю Аўтуховічу прад'яўлена абвінавачванне па арт. 359 КК (тэрарыстычны акт) у выглядзе падрыхтоўкі (арт. 13 КК) замаха на жыццё вышэйшых службовых асоб Гарадзенская вобласці.

Беларуская і міжнародная грамадскасць разглядае Мікалая Аўтуховіча і Ўладзіміра Асіпенка палітычнымі вязнямі. У студзені 2010 года аб гэтым заявіла ўплывовая праваабарончая арганізацыя «Human Rights Watch».

За кратамі прадпрымальнік Мікалай Аўтуховіч правёў галадоўку пратэсту тэрмінам у 91 дзень – самую працяглую ў гісторыі незалежнай Беларусі.

Палітычны пераслед Мікалая Аўтуховіча і Ўладзіміра Асіпенкі з’яўляецца помстай рэжыма за іх барацьбу з карупцыяй, за абарону правоў уласнасці прадпрымальнікаў.

Мікалай Аўтуховіч пераследуецца ўладамі і як ініцыятар стварэння грамадскай арганізацыі ветэранаў баявых дзеянняў “Абаронца Айчыны”. Ён з’яўляецца прадаўжальнікам справы гвалтоўна выкрадзенага амаль адзінаццаць год таму былога міністра ўнутраных спраў Юрыя Захаранкі. У знак пратэсту супраць сацыяльнай палітыкі ўлад да воінаў-інтэрнацыяналістаў Мікалай заклікаў паплечнікаў адмовіцца ад юбілейнай узнагароды з нагоды дваццацігоддзя са дня вывада савецкіх войскаў з Аўганістана. За тыдзень да 15 лютага Аўтуховіч быў арэставаны.

Патрабуем неадкладнага вызвалення палітычных вязняў Мікалая Аўтуховіча і Ўладзіміра Асіпенкі.

Нагадваем службовым асобам аб непазбежнай адказнасці за выкарыстанне права ў палітычных мэтах.

0 Комментариев